0
Shares
सिनेसुत्र, बिराटनगर- एक्सन निर्देशक सिमसोन तामाङको निर्देशन रहने सिनेमा ‘रातो पासपोर्ट’ को मिनिमल पोस्टर सार्वजनिक गर्दै निर्माण घोषणा गरिएको छ । युरोपका देशहरूमा त्यहाँको नागरिकता (रातो पासपोर्ट) प्राप्त गर्ने उद्देश्यका साथ पुगेका नेपालीहरूले गर्ने सङ्घर्षको कथालाई सिनेमाले पर्दामा उतार्ने जनाइएको छ।
सिबर्ड्स पिक्चर्स र होप्स बजको प्रस्तुति तथा ट्राइडेन्ट कन्सेप्टको सहकार्यमा बन्न लागेको यस सिनेमाको निर्देशन सिमसोन तामाङले गर्दैछन्। सिनेमाको कथा माइकल तामाङले लेखेका हुन् भने पटकथा तथा संवाद प्रदीप कुमार चौधरीले तयार पारेका छन्।
निर्माण पक्षले केही दिनअघि सामाजिक सञ्जालमा “सबै भन्छन् – त्यता गएपछि सेटल भइन्छ रे। परिवारको भविष्य सुरक्षित हुन्छ रे। रातो पासपोर्ट पाइन्छ रे…!” भन्दै पोस्ट गरेका थिए। तर, औपचारिक निर्माण घोषणा भने आइतबार मात्र भएको हो। पोस्टरको थिम युरोपको देश पोर्चुगलको पासपोर्टको कभर पेजको स्टाइलमा तयार पारिएको छ।
‘रातो पासपोर्ट’मा लोक बहादुर तामाङ निर्माताको रूपमा छन् र प्रवेश पौडेल कार्यकारी निर्माताको भूमिकामा रहनेछन्। पौडेलले यसअघि ‘अमेरिका ब्वाइज’ र ‘बिहे पास’ सिनेमाको निर्देशन गरेका थिए।
सिनेमाको प्राविधिक टिममा मेकअप तथा एसएफएक्सका लागि अमृत मरहट्ठा, छायाकारका रूपमा रवीन्द्र न्यौपाने र सङ्गीतकारका रूपमा जयन जे. वाइबा जोडिएका छन्। पोस्टर तथा पब्लिसिटी डिजाइन रोयल भीमसेन (ट्राइडेन्ट कन्सेप्ट टिम) ले गर्नेछन्।
निर्देशक सिमसोन तामाङ नेपाली सिनेमा उद्योगमा एक्सन निर्देशक तथा प्रमुख सहायक एक्सन निर्देशकका रूपमा लामो समयदेखि सक्रिय छन्। उनले सन् २०१३ मा ‘बाउन्सर’, ‘बडी गार्ड’, ‘लभ सब’, ‘मधुमास’, ‘ब्ल्याक फ्ल्याग’, ‘किल्ला’, ‘ऐश्वर्य’, ‘राधे’, ‘रुद्र’, ‘पिँजडा ब्याक अगेन’ लगायतका नेपाली एक्सन सिनेमाहरूमा प्रमुख सहायक एक्सन निर्देशकको रूपमा काम गरेका छन्। यस्तै, उनले ‘धन्य माया जाल’, ‘असुर द मिस्ट्री’ (हिन्दी) र ‘लप्पन छप्पन २’ जस्ता सिनेमामा एक्सन निर्देशकको रूपमा काम गरिसकेका छन्।
सिनेमाका कलाकार तथा क्रू सदस्यहरू नेपालबाट चाँडै नै छनौट गरिने निर्माण पक्षले जनाएको छ। यसका साथै, युरोप र युकेमा रहेका कलाकारहरूलाई अडिसनमार्फत छनोट गरिने योजना रहेको कार्यकारी निर्माता प्रवेश पौडेलले बताए। सिनेमाको छायाङ्कन पोर्चुगल, युरोपका अन्य केही देश र नेपालमा हुनेछ।
