कोशी प्रदेशमा सिनेमा ‘होस्टेल ३’ को अग्रिम बुकिङ उच्च : व्यापक ओपनिङ

सिनेसुत्र, बिराटनगर- शुक्रवार रिलिज हुने नेपाली सिनेमा ‘होस्टेल ३’ को प्रदर्शन मिति नजिकिएसँगै देशभर अग्रिम टिकट बुकिङ खुला भएको छ । सिनेमाले कोशी प्रदेशमा उत्साहजनक शो प्राप्त गरेको छ । बिराटनगरको सिटि सिनेमाजले ५ शो, सेन्ट्रल मलले ५ शो, क्युएफएक्स सिनेमाजले ४ शो, इटहरीको क्युएफएक्स सिनेप्लेक्सले ३ शो, र बिर्तामोडको क्युएफएक्स वन स्टपले ५ शो दिएको छ । कोशी प्रदेशका अन्य सहरहरूको सिनेमा घरमा शो खुल्न बाकि रहेको छ ।

कोशी प्रदेशको सहर बिराटनगर बोडर नजिक भएका कारण यहाँ नेपाली सिनेमा कम मात्रामा चल्ने गर्छ । अझ खुलेर भन्नु पर्दा, यहाँ भारतीय र हलिउड सिनेमा रुचाउने दर्शकहरूको बाहुल्यता छ । तर, नेपाली सिनेमाको माउथ पब्लिसिटी बलियो भएपछि सिनेमाको शो बढ्ने गरेको छ । यसअघि प्रदर्शनमा आएको सिनेमा ‘लाज शरणम’ ले उच्च शो पाएको थियो भने दशैँको समयमा ‘छक्का पन्जा ५’ र ‘१२ गाउँ’ ले पनि राम्रो शो पाएको थियो ।

तर, त्यसपछि बिराटनगरमा नेपाली सिनेमाको बजार सुस्ताएको थियो। अब, ‘होस्टेल ३’ ले यो बजारलाई तताउने अपेक्षा गरिएको छ र सिनेमाले कोशी प्रदेशका दर्शकहरूको मन जित्न सक्ने देखिन्छ।यस्तै देश भरिका सिनेमा घरहरुमा शो खुल्ला भएको छ, नेपालकै सबैभन्दा ठुलो मल्टिप्लेक्स चेन क्युएफएक्स सिनेमाजमा करिब ८० शो, दोस्रो ठुलो चेन आइएनआइ सिनेमाजमा १५ शो तथा वन सिनेमाजमा ९ शो, बिग मुभिजमा ५ शो, र एफक्युब सिनेमामा ५ शो, बिएसआर सिनेमाजमा ४ शो समावेश छन् । बुधवार साँझसम्म देशभर करिब १२० शो सङ्ख्याको अग्रिम बुकिङ सुरु भएको छ भने बिहीबार दिउसोसम्म करिब २५० शो प्राप्त गर्ने अपेक्षा निर्माताहरूले गरेका छन् । हलहरूले उपलब्ध गराएको शो सङ्ख्या हेर्दा यस सिनेमा को व्यापक ओपनिङको प्रक्षेपण गरिएको छ ।

‘होस्टेल’ शृङ्खलाका अघिल्ला दुई संस्करण बक्स अफिसमा सफल भएका थिए । यस कारणले नै तेस्रो भागलाई पनि दर्शकको राम्रो साथ मिल्ने अपेक्षा गरिएको छ । यो सिनेमा युवा पुस्तालाई लक्षित छ, जो नेपाली सिनेमा का मुख्य दर्शक वर्ग हुन्, उनीहरूबिच लोकप्रिय हुने सम्भावना छ । ‘होस्टेल ३’ को ट्रेलर र प्रचार-प्रसारले सकारात्मक हाइप बनाएकाले हल सञ्चालकहरूले बक्स अफिसमा राम्रो व्यापार गर्ने अनुमान गरेका छन् । यसले गर्दा उनीहरूले अग्रिम रूपमा नै धेरै शो दिएका छन् ।

सिनेमा को ट्रेलर सार्वजनिक भएसँगै यसको चर्चा बढेको थियो । ट्रेलर रिलिजको ६ घण्टामै युट्युबको ट्रेन्डिङ यात्रा सुरु गरेको ट्रेलरले २१ घण्टामा नै १० लाख भ्युज प्राप्त गरेको थियो भने हालसम्म यो क्रम २१ लाख माथि पुगिसकेको छ । हालसम्म पनि नेपालमा सिनेमा सेक्सनमा पहिलो स्थानमा रहेको ट्रेलर भारत, बेलायत, जापान, कोरिया, मध्यपूर्वका देशहरू सहित २० भन्दा धेरै देशमा ट्रेन्डिङमा आएको थियो । सिनेमा ले भारतीय सिनेमा उद्योगहरूको विशाल संसारमा समेत ट्रेन्डिङमा प्रवेश गरी इतिहास कायम गरेको थियो ।निर्माण टिमले डिजिटल प्लेटफर्म, सामाजिक सञ्जाल, सञ्चार माध्यमहरू तथा विभिन्न कार्यक्रमहरूमा प्रभावशाली प्रचार गरिरहेको छ । जसको कारण हल सञ्चालकहरू पनि सकारात्मक छन् । त्यस्तै, यस सिनेमा मा युवा कलाकारहरूको नयाँ टोली रहेको छ, जसलाई दर्शकले नयाँपनका रूपमा हेर्नेछन् । साथै, डिजिटल युगका लोकप्रिय अनुहारहरूले अभिनय गरेकोले उनीहरूको फ्यान फलोइङले पनि दर्शक तान्ने सम्भावना छ ।

सशान कँडेलले निर्देशक गरेको यस सिनेमा को मुख्य भूमिकामा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुली लगायत रहेका छन् । अभिनेता प्रवीण खतिवडा वार्डेनको भूमिकामा छन् भने आशिष पुरुष, रोहन श्रेष्ठ, उमर खान र सन्तोष बानियाँ पनि सिनेमा मा रहेका छन् ।

सिनेमा को कथा माधव शर्मा ले लेखेका हुन्, जसले एसोसियट निर्देशकको भूमिका पनि निभाएका छन् । सिनेमा का निर्माता सुरेश कँडेल, कर्ण कार्की, गोविन्द अधिकारी हुन् भने सह-निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर रहेका छन् । कार्यकारी निर्माता शङ्कर कोइराला हुन् भने लाइन प्रोड्यूसर कोसिस राज क्षेत्री रहेका छन् ।

सिनेमा को छायाङ्कन निर्देशन अर्जुन तिवारीले गरेका छन् भने सम्पादन विकास दाहालले गरेका छन् । सिनेमा का एक्सन निर्देशक हिमाल केसी हुन् । सङ्गीतमा अर्जुन पोखरेल, अल्मोडा राणा उप्रेती, महेश ज्ञवाली र किरण माइकल छन् । यसमा यम ओलीको प्रोडक्शन डिजाइन रहेको छ । नृत्य निर्देशन प्रवीण सिंह र रोशन विश्वकर्माले गरेका छन् । सिनेमा को वितरण काठमाडौं उपत्यकामा काफिया फिल्म्स (गोविन्द शाही) र उपत्यका बाहिर आरआर फिल्म्स (रोहित कट्टेल, रत्न श्रेष्ठ) ले गर्नेछन् । ट्रेलर हेर्नुहोस :