मेयर बालेनले ‘लाज शरणम्’ हेरेपछि भने : “लास्टै दामी, लास्टै मजा आयो – धुर्मुसप्रति सम्मान

सिनेसुत्र, बिराटनगर-  काठमाडौं महानगरपालिकाका मेयर बालेन्द्र शाह (बालेन)ले सिताराम कट्टेल (धुर्मुस)को तारिफ गरेका छन्। प्रदर्शनरत सिनेमा ‘लाज शरणम्’ हेरेर बालेनले धुर्मुसको खुलेर तारिफ गरेका हुन्। बालेनले सोमबार साँझ दरबारमार्गस्थित क्यूएफएक्स हलमा दोस्रो हप्तामा प्रदर्शन भइरहेको सिनेमा ‘लाज शरणम्’ हेरेका हुन्।

“यस्तो डिटेल दिनुभा’छ नि! कस्तो डिटेल दिया हो? लास्टै दामी। लास्टै मजा आयो,” सिनेमा हेरेपछि बालेनले धुर्मुसको तारिफ गरे। बालेनले धुर्मुसको प्रशंसा गर्दै अँगाल्दै भने, “एकदमै राम्रो काम गर्नुभएको छ। म पनि कलाकार हुँ, हामीलाई कला देखाउन पाए हुन्थ्यो भन्ने चाहना हुन्छ। हेरिरहँदा एकदमै मज्जा आयो।” बालेन मिडियालाई खबर नगरी सिनेमा हेर्न पुगेका थिए।सिनेमा ‘लाज शरणम्’मा समावेश ‘नेपाल हाँसेको’ र्यापमा बालेनको स्वर छ, जसले दर्शकमाझ निकै चर्चा पाएको थियो। सिनेमामा भने यो गीत छैन। क्रेडिटलाइन स्क्रोल हुन थालेपछि यो गीत बज्छ।

सिनेमाले हालसम्म कति कलेक्सन गर्यो भन्ने निर्माणपक्षले खुलाएको छैन। पहिलो दिनको कलेक्सन रिपोर्ट भने सार्वजनिक भएको थियो। पहिलो दिन यो सिनेमाले एक करोड १० लाख कलेक्सन गरेको थियो।

कुमार कट्टेलको निर्देशनमा बनेको ‘लाज शरणम्’ धुर्मुस मुख्य भूमिकामा छन्। सिनेमामा सिताराम कट्टेल, महेश त्रिपाठी, विजय बराल, अर्जुन घिमिरे, सागर लम्साल, हरिष निरौला, अर्पण थापालगायत कलाकार मुख्य भूमिकामा छन्।

जेपीटी क्रिएसनको ब्यानरमा निर्माण भएको सिनेमामा नवीन श्रेष्ठ निर्माता छन्। राम नरेश शाह र सिर्जना खड्का सहनिर्माता छन्।