दर्शकको मन जित्दै प्रदर्शनको छैटौं हप्तामा प्रवेश ‘लाज शरणम्’

सिनेसुत्र, बिराटनगर-  सिनेमा ‘लाज शरणम्’ प्रदर्शनको छैटौं हप्तामा प्रवेश गरेको छ। शिवरात्रिको अवसर पारेर फागुन १४ गतेबाट रिलिज आएको सिनेमा छैटौं सातामा प्रवेश गरेको हो। प्रदर्शनको पहिलो दिनमै उल्लेखनीय कमाइ गर्दै सफल यात्रा तय गरिरहेको यस सिनेमाले दर्शकबाट राम्रो प्रतिक्रिया पाइरहेको निर्माण टिमले बताएको छ।

सिनेमा ‘लाज शरणम्’ उच्च शो सहित प्रदर्शनमा आएको थियो र अहिले पनि यसको शोहरूमा दर्शकको उपस्थिति उत्साहजनक रहेको छ। दर्शकबाट निरन्तर सकारात्मक प्रतिक्रिया पाइरहेको यस सिनेमाले अझै केही समय प्रदर्शनको यात्रा कायम राख्ने अपेक्षा गरिएको छ।

“सिनेमा लाज शरणम् सफलतासहित छैटौं हप्तामा प्रवेश गरेको छ,” निर्माता नवीन श्रेष्ठले भने, “दर्शकको राम्रो प्रतिक्रिया र राम्रो व्यापार गर्दै लाज शरणम् तेस्रो हप्तामा प्रवेश गरेको हो। अहिले पनि सिनेमालाई उपलब्ध शोमा दर्शकको संख्या उच्च छ।”‘लाज शरणम्’ले पहिलो दिन एक करोड १० लाख रुपैयाँ ग्रस कलेक्सन गरेको थियो। यसपछिको व्यापारिक आँकडा निर्माताले सार्वजनिक गरेका छैनन्।

चर्चित हास्य सिरियल ‘सक्किगोनि’ टिमले निर्माण गरेको सिनेमामा सीताराम कट्टेल, विजय बराल, अर्पण थापा, महेश त्रिपाठी, मुकुन्द श्रेष्ठ, विजय लामा, रेणुनाथ योगी, सागर लम्साल, हरि निरौला, अर्जुन घिमिरे, कमलमणि नेपाल, प्रियाना आचार्य, दयाहाङ राई र बुद्धि तामाङ लगायतको अभिनय छ।

‘लाज शरणम्’लाई कुमार कट्टेल (जिग्री) ले निर्देशन गरेका हुन्। जेपिटी क्रियसनको ब्यानरमा बनेको सिनेमा निर्माता नवीन श्रेष्ठ हुन् भने राम नरेश शाह र सृजना खड्का सह–निर्माताका रूपमा रहेका छन्। ट्रेलर हेर्नुहोस :