प्रदीप खड्का र पल शाहको भिडन्त : ‘एक्टर’ र ‘मायाबी’ कार्तिक १५ मा : बक्स अफिसमा युद्धको तयारी !

सिनेसुत्र, बिराटनगर – नेपाली सिनेमा उद्योगका दुई चर्चित नायक, प्रदीप खड्का र पल शाह, जसले ‘पुजार सार्की’ मा मुख्य भूमिका निभाएर सफलता हासिल गरेका थिए, अब कार्तिक १५ मा एकअर्कासँग भिड्न तयार भएका छन् ।
‘पुजार सार्की’ ले जेठ महिनामा सुखद कमाई गरेपछि, कसको स्टार पावरले सिनेमालाई अगाडि बढायो भन्ने बहस अझै चलिरहेको छ।

यसैबीच, कार्तिक १५ लक्ष्मीपूजाको दिनलाई लक्षित गर्दै, प्रदीप खड्का अभिनित सिनेमा ‘एक्टर’ प्रदर्शन हुने पक्का भएको छ। राजन भुषालको निर्देशनमा तयार भएको यस सिनेमाको छायांकन लगभग सकिएको छ, यो सिनेमा सोलो रिलिजको योजनामा थियो तर अब, पल शाह अभिनित सिनेमा ‘मायाबी’ पनि यही मितिमा दिवाकर भट्टराईको निर्देशनमा तयार भएको सिनेमा ‘मायाबी’ रिलिज हुने पक्का भएको छ।

सिनेमा ‘मायाबी’ मा पल शाहसँगै दीपिका प्रसाई, सुशिल सिटौला, करिश्मा श्रेष्ठ, र समीम खानको मुख्य भूमिका रहेको छ। केही दिनमै सिनेमाको फस्टलुक सार्वजनिक गर्दै निर्माण पक्षले कार्तिक १५ लाई रिलिज मिति घोषणा गर्नेछ।

दुवै नायकका फ्यानहरूबीच यो भिडन्तले ठूलो उत्सुकता र प्रतिस्पर्धा निम्त्याउने देखिएको छ। अब, नेपाली सिनेमाका दर्शकहरू प्रतिक्षामा छन्—कार्तिक १५ मा प्रदीप र पलको भिडन्तले बक्स अफिसमा कस्तो प्रभाव पार्ने हो।