दसैंको फूलपातीमा आउने ‘आ बाट आमा २’मा निकिता आचार्यको मुख्य भूमिका

सिनेसुत्र, बिराटनगर- चन्द्र पन्तको निर्देशनमा निर्माण हुने सिनेमा ‘आ बाट आमा २’ का लागि अभिनेत्री निकिता आचार्य अनुबन्ध भएकी छन्। निर्माण पक्षले बिहीबार उनलाई सिनेमाका लागि अनुबन्ध गरेको हो। सिनेमाका निर्देशक तथा निर्माता चन्द्र पन्तले निकितालाई मुख्य भूमिकामध्ये एकमा अनुबन्ध गरिएको जानकारी दिए। उनले भने, हामीले निकितालाई सिनेमाको एक मुख्य भूमिकामा अनुबन्ध गरेका छौँ।

निकिताले यसअघि पनि केही सिनेमामा अभिनय गरिसकेकी छन्। आगामी असोज ३० गते अर्थात् दसैंको फूलपातीबाट प्रदर्शनमा आउने यस सिनेमामा यसअघि पल शाह, आकाश श्रेष्ठ, विपना थापा, प्रदीप रावतका साथै साइग्रेस पोखरेल, गजित विष्ट र नरेन खड्का अनुबन्धित भइसकेका छन्। यस सिनेमाको कथा तथा पटकथा निर्देशक पन्तकै रहेको छ।

नेपालमा सिनेमाको वितरण आरआर फिल्म्सले गर्नेछ भने डिजिटल अधिकार ओएसआरले लिएको छ। आर्या इन्टरटेनमेन्ट प्रालिको ब्यानरमा निर्माण हुने यस सिनेमाका प्रोडक्सन म्यानेजर करणसिंह रसाली रहेका छन्।