0
Shares
सिनेसुत्र, बिराटनगर- निर्भाना प्रोडक्सन र डिएडी प्रोडक्सनको सहकार्यमा नयाँ नेपाली सिनेमा ‘हजारौँमा एक’ निर्माण हुने भएको छ। एक्सन–एड्भेन्चर विधामा निर्माण हुन लागेको यो सिनेमा रहस्य र अलौकिक कल्पनामा गहिरोसँग आधारित रहेको निर्माण पक्षले जनाएको छ। फरक स्वाद, भव्य दृश्य प्रस्तुति तथा उच्चस्तरीय निर्माण शैलीमार्फत नेपाली सिनेमा उद्योगमा नयाँ मापदण्ड स्थापित गर्ने लक्ष्यका साथ यो सिनेमा निर्माण गर्न लागिएको हो।
सिनेमाको निर्देशन सञ्चारकर्मी समेत रहेका अनुभवी निर्देशक सुव्रत आचार्यले गर्नेछन्। सिनेमाको कथा सीता मायाले परिकल्पना गरेकी हुन् र उनी नै सिनेमाकी प्रस्तुतकर्ता पनि हुन्। दिपेन्द्र गौतम ‘माइकल’ कार्यकारी निर्माताको भूमिकामा रहनेछन् भने चर्चित छायाकार हरि हुमागाई सिनेमाका डिओपी रहने निश्चित भएको छ।
सिनेमाको मूल भाषा नेपाली रहने भए पनि यसलाई अन्तर्राष्ट्रिय दर्शकमाझ पुर्याउने उद्देश्यले मलियालम र हिन्दी भाषामा समेत डबिङ गरिनेछ। सिनेमाका परिकल्पनाकार तथा मुख्य अभिनेता भारतको मलियालम सिनेमा उद्योगसँग आबद्ध रहेका छन्। मुख्य अभिनेतासम्बन्धी विस्तृत जानकारी केही समयपछि सिनेमाको अफिसियल फर्स्ट लुक सार्वजनिक गर्ने क्रममा गरिने निर्माण पक्षले जनाएको छ। साथै, सिनेमामा मलियालम सिनेमा उद्योगका केही कलाकार तथा प्राविधिकहरूको पनि सहभागिता रहने निर्देशक आचार्यले जनाए।
सिनेमाको पटकथालाई नेपाली परिवेश अनुकूल संवाद रूपान्तरण तथा परिमार्जन गर्ने कार्य चर्चित लेखक शान बस्नेतले गरिरहेका छन्। सिनेमाको छायाङ्कन यसै वर्षको फागुन–चैत महिनादेखि सुरु गर्ने तयारी भइरहेको छ।
निर्माण पक्षका अनुसार सिनेमाका अधिकांश प्रमुख भूमिकामा नेपाली कलाकारहरूको अभिनय रहनेछ। त्यसैगरी, छायाङ्कन टोलीसहित अधिकांश प्राविधिक टोली पनि नेपाली सिनेमा उद्योगकै रहनेछन्। सिनेमाको गीत–सङ्गीत समेत नेपाली सर्जकहरूले नै तयार गर्नेछन्।
करिब चार करोड रुपैयाँको अनुमानित लागतमा निर्माण हुन लागेको ‘हजारौँमा एक’ नेपाली सिनेमा उद्योगका लागि एउटा महत्त्वपूर्ण र भव्य परियोजनाका रूपमा हेरिएको छ। अलौकिक कल्पना, साहसिक यात्रा, एक्सन तथा आधुनिक सिनेमा प्रविधिको प्रभावकारी संयोजनमार्फत नेपालकै पर्यटकीय स्थलहरूमा छायाङ्कन गरी निर्माण हुने यस सिनेमाले स्वदेशी तथा अन्तर्राष्ट्रिय दुवै दर्शकमाझ विशेष आकर्षण सिर्जना गर्ने निर्माण पक्षको विश्वास रहेको छ।
