‘कोशेढुंगा’को घोषणा: ‘पूर्ण बहादुरको सारङ्गी’ फेम्ड सरोज पौडेलको नयाँ सिनेमा २०८२ मा रिलिज हुने

सिनेसुत्र, बिराटनगर- सिनेमा ‘कोशेढुंगा’ निर्माणको घोषणा गरिएको छ। हिस्टोरिकल ब्लकबस्टर ‘पूर्ण बहादुरको सारङ्गी’ फेम्ड निर्देशक सरोज पौडेलले ‘कोसेढुंगा’ निर्माणको घोषणा गरेका हुन्।

सरोज पौडेलले आफूले निर्देशन गर्ने सिनेमाको थिम पोस्टर सार्वजनिक गर्दै निर्माणको घोषणा गरेका छन्। थिम पोस्टरमा घुरमैलो बिहानीलाई पृष्ठभूमीमा राखेर पहाडलाई हेरिरहेकी एक महिला उभिएछिन्। माथि डाँडामा उभिएकी उनको अगाडि अग्लो रुख र पहाडी शैलीको घर छ। परपर क्षितिज छ। घुरमैलो कलरले पहाडी कठिन जीवन, अग्लो रुखले पहाडी जीवन बाँच्नेका अग्ला सपना र क्षितिजले भेट्न नसकिने सपनाको संकेत गरेको अनुमान लगाउन सकिन्छ। डाँडामा उभिएर पहाडलाई हेर्दै गरेकी महिलाले पहाडी जीवन छोडेर सपना पछ्याउने हिँडेको अर्थ लगाउन सकिन्छ।यो पोस्टरले ‘कोसेढुंगा’ सोसल ड्रामा भएको प्रष्ट हुन्छ। अभाव, अग्लो सपना र संघर्षको कथा सिनेमाले भन्ने संकेत गरेको छ। यसबारे निर्माणपक्षले भने केही बोलेको छैन। निर्माण पक्षले जानकारी दिए अनुसार सिनेमा २०८२ मा रिलिज हुनेछ। नरदेवी फिल्मसको प्रस्तुति रहेको सिनेमामा प्रेविल कँडेल र हरि महतको लगानी रहने छ भने दिनेश खड्का कार्यकारी निर्माता रहेका छन्।

बाबु श्रेष्ठको डीओपी रहने सिनेमा सुरेन्द्र पौडेलले सम्पादन गर्नेछन्। सिनेमामा संगीत रिदम कँडेल र आषिश अविरलको रहनेछ। कास्टिङ डिरेक्टर सुवलमणि सापकोटा रहनेछन्। सिनेमाको मुख्य भूमिकामा को-को रहनेछन् त्यो भने निर्माण टिमले जानकारी दिएको छैन।

“सिनेमा कस्तो हुने, कथा के हो, कलाकार को–को हुने त्यो हामी केही समयपछि जानकारी गराउनेछौँ,” निर्देशक पौडेलले भने, “तर हामी यति भन्छौँ, पूर्ण बहादुरको सारङ्गी जसरी दर्शकले मन पराउनुभयो त्यसैगरी मन जित्ने सिनेमा बनाउने प्रयासमा छौँ।”

उनले निर्देशन गरेको ‘पूर्ण बहादुरको सारङ्गी’ले नेपाली सिनेमा उद्योगमा सबैभन्दा धेरै कमाउने सिनेमाको रेकर्ड राखिसकेको छ। करिब ५० करोड रुपैयाँ नेपाली बक्सअफिसबाट मात्रै कलेक्सन गरेको छ।

त्यसैले उनै निर्देशकले बनाउने ‘कोशेढुंगा’ पनि सफल हुनेमा अपेक्षा राख्न सकिन्छ। ‘पूर्ण बहादुरको सारङ्गी’का निर्देशकले निर्देशन गर्ने भएकाले यो सिनेमा प्रतिक्षित हुनेछ।