स्कुलले शो बुकिङ गर्न थालेपछि ‘रोल नं १’को क्रेज बढ्दो : नर्स विद्यार्थी र अभिभावकसम्म बढ्दो क्रेज

सिनेसुत्र, बिराटनगर- सिनेमा ‘रोल नं १’ले विद्यार्थी र अभिभावकको साथ पाएको छ । सिनेमा हेर्ने विद्यार्थी र अभिभावकले ‘रोल नं १’को तारिफ गरेका छन् । सिनेमा हेर्नेले पुनः ‘रोल नं १’ हेर्न आउने बताएका छन् । “हाम्रो सिनेमालाई विद्यार्थी, स्कुलको साथ छ । हेर्ने जति सबैले भन्छन्- हामीले मात्र हेरेर हुँदैन, बुवा आमासहित फेरि हेर्न आउने छौँ,” निर्माता विनोद पौडेलले भने, “विद्यार्थी आउँदा हामी बुवाआमालाई पनि लिएर आउँछौँ भनिरहनु भएको छ । बुवाआमा आएर हेर्दा छोरोछोरीलाई पनि लिएर आएर हेर्ने हो भनिरहनु भएको छ ।

विद्यार्थी र अभिभावक दुवैको साथ ‘रोल नं १’लाई मिलेको उनले बताए । सिनेमाले नेपाली शैक्षिक प्रणाली र यसको मूल्यांकन विधिमा उठाएको प्रश्नप्रति अभिभावक र विद्यार्थी दुवै कन्भिन्स भएको निर्माता पौडेलको भनाइ छ । सिनेमालाई दर्शकले मन पराएकाले वर्ड अफ माउथ पनि राम्रो रहेको उनको भनाइ छ । पछिल्लो समय यो सिनेमा स्कुलले पूरै शो नै बुकिङ गरेर हेरिरहेका छन् । स्कुलले शो नै बुकिङ गरेर हेरिरहेको भिडियो र तस्बिरहरू सामाजिक सञ्जालमा बाक्लै देखिरहेका छन् । विद्यार्थीहरू सिनेमा हेर्न गएपछि सिनेमाले पाएका शो हाउसफुल भइरहेको निर्माणपक्षले जनाएको छ ।यसरी सिनेमा हेर्ने दर्शक आएपछि अझै लामो समय ‘रोल नं १’ चल्नेमा निर्माण टिम ढुक्क छ । सिनेमा हेर्ने दर्शकले विद्यार्थी, शिक्षक र अभिभावक सबैले हेर्नै पर्ने सिनेमा भनेर तारिफ गरिरहेका छन् । यो सिनेमाले हालसम्म नेपाली बक्सअफिसमा एक करोडभन्दा माथि ग्रस कलेक्सन गरिसकेको छ । सेभेन सिज सिनेमाको ब्यानरमा निर्माण भएको यो सिनेमालाई जोन योञ्जनले निर्देशन गरेका छन् । सिनेमामा मुकुन भुसाल, सुशांक मैनाली, रेणु योगी र सिर्जना अधिकारी मुख्य भूमिकामा छन् । सिनेमाको बाल कलाकारमा निर्भिक रेग्मी, रिन्चेन लामा, संयम कटुवाल र सिजल श्रेष्ठ रहेका छन् ।

विनोद पौडेल र जान्वी पौडेल निर्माता रहेको सिनेमाको सह–निर्मातामा छत्रमाया गिरी र रमेश चौलागाईं छन् । ‘रोल नं १’ सिनेमाको कथा महेश दवाडीले लेखेका हुन् । शिवराम श्रेष्ठ डीओपी रहेको यो सिनेमामा प्रशान्त शिवाकोटीको संगीत र मदन घिमिरेको सम्पादन छ ।