‘कोशेढुंगा’ मुख्य कलाकारको दमदार लाइनअप :अन्तर्राष्ट्रिय अधिकार छायांकन अगावै बिक्री

सिनेसुत्र, बिराटनगर- हिस्टोरिकल ब्लकबस्टर सिनेमा ‘पूर्ण बहादुरको सारङ्गी’ फेम्ड निर्देशक सरोज पौडेलले ‘कोशेढुंगा’ निर्माणको घोषणा गरेसँगै यसको लाइनअपलाई लिएर चर्चा भइरहेको छ। निर्देशक पौडेलको यो सिनेमामा को–को कलाकार छन् भन्ने कुराको कौतुहल सिनेमा वृत्त र सिनेमाका शुवेच्छुकमा कौतुहल छ।

निर्देशक सरोजका अनुसार सिनेमाका मुख्य कलाकारको लाइनअप पूरा भएको छ। सुरक्षा पन्त र आर्यन सिक्देलसँगै नीति शाह र प्रवीण खतिवडा अनुबन्ध भइसकेका छन्।थिम पोस्टरले पनि ‘कोशेढुंगा’मा महिला चरित्रले सिनेमा लिड गर्ने प्रष्ट संकेत गरिसकेको थियो। तर, को हो त्यो भने निर्देशक पौडेल खुलाएका छैनन्।सरोजले निर्देशन गरेको ‘पूर्ण बहादुरको सारङ्गी’ले नेपालमा मात्रै करिब ५० करोड ग्रसकलेक्सन गरिसकेको छ।

‘कोशेढुंगा’ सोसल ड्रामा हो। अभाव, अग्लो सपना र संघर्षको कथा सिनेमाले भन्ने संकेत थिम पोस्टरले गरेको छ। “सिनेमा कस्तो हुने, कथा के हो, कलाकार को–को हुने त्यो हामी केही समयपछि जानकारी गराउनेछौँ,” निर्देशक पौडेलले भने, “तर हामी यति भन्छौँ, पूर्ण बहादुरको सारङ्गी जसरी दर्शकले मन पराउनुभयो त्यसैगरी मन जित्ने सिनेमा बनाउने प्रयासमा छौँ।”

‘पूर्ण बहादुरको सारङ्गी’का निर्देशकले निर्देशन गर्ने भएकाले यो सिनेमा प्रतिक्षित हुनेछ। त्यसैले उनै निर्देशकले बनाउने ‘कोशेढुंगा’ पनि सफल हुनेमा अपेक्षा राख्न सकिन्छ।फागुन २ गतेदेखि छायांकन हुने सिनेमा २०८२ मा रिलिज हुने निर्माण पक्षले जानकारी दिएको छ। नरदेवी फिल्मसको प्रस्तुति रहेको सिनेमामा प्रेविल कँडेल र हरि महतको लगानी रहनेछ भने दिनेश खड्का कार्यकारी निर्माता रहेका छन्।

बाबु श्रेष्ठको डीओपी रहने सिनेमा सुरेन्द्र पौडेलले सम्पादन गर्नेछन्। सिनेमामा संगीत रिदम कँडेल र आषिश अविरलको रहनेछ। कास्टिङ डिरेक्टर सुवलमणि सापकोटा रहनेछन्। ‘पूर्ण बहादुरको सारङ्गी’का निर्देशकले निर्देशन गर्ने भएकाले ‘कोशेढुंगा’ सिनेमा प्रतिक्षित हुनेछ। यो सिनेमाको छायांकन अगावै अन्तर्राष्ट्रिय प्रदर्शन अधिकार बिक्री भएको छ। अन्तर्राष्ट्रिय वितरण ‘सेभेन सिज इन्टरनेसनल’ कम्पनीले खरिद गरेको छ।