0
Shares
सिनेसुत्र, बिराटनगर- आगामी कात्तिक ६ गते भाइटीकाको अवसर पारेर रिलिज हुन लागेको सिनेमा ‘वरिष्ठ बलराम’ यतिबेला चर्चाको शिखरमा छ। सिनेमा को सार्वजनिक गीत ‘न्यौली बनैमा’ र ट्रेलरले दर्शकहरूको मन जित्न सफल भएका छन्। ‘वरिष्ठ बलराम’ को गीत ‘न्यौली बनैमा’ ले सामाजिक सञ्जाल र विशेषगरी टिकटकमा व्यापक लोकप्रियता बटुलिरहेको छ।
सार्वजनिक भएको दुई हप्तामै यस गीतले युट्युबमा ५२ लाख ९६ हजारभन्दा बढी भ्युज प्राप्त गरिसकेको छ, जसले यसको लोकप्रियता स्पष्ट पार्छ। प्रशान्त शिवाकोटीको शब्दरचना र संगीत रहेको यस गीतमा प्रशान्त र शान्तीश्री परियारको सुमधुर स्वर रहेको छ।
सार्वजनिक गीतमा एकअर्कालाई मन पराउने युगल जोडीको भूमिकामा विजय बराल र समृद्धि अर्याल छन्। गीतमा शंकाका बीचमा सँगै जीवन बिताउने सहमति गर्छन्। विशेषगरी, विजयको अभिनय कौशल र नृत्यले दर्शकबाट निकै प्रशंसा पाएको छ, जसले सिनेमा को समग्र पब्लिसिटीमा ठूलो सहयोग पुर्याएको छ। धेरै दर्शकहरूले गीत र नृत्य दुवैको खुलेर प्रशंसा गर्दै सिनेमा को सफलताको कामना गरेका छन्।
गीतको सफलतासँगै सिनेमा को ट्रेलरले पनि दर्शकबाट उत्साहजनक प्रतिक्रिया प्राप्त गरेको छ। चार दिनअघि सार्वजनिक भएको ट्रेलरलाई पनि दर्शकले रुचाएका छन्। ट्रेलरले १३ लाख ९६ हजारभन्दा माथि भ्युज पाएको छ। सिनेमा को ट्रेलरमा दयाहाङ राई र विजय बरालको टकराबलाई दर्शकले मन पराएको पाइएको छ।
दयाहाङको फरक गेटअपसँगै दयाहाङ र विजयको अभिनयको युट्युबमा ट्रेलर हेर्ने दर्शकले तारिफ गरिरहेका छन्। एकले अर्काको अस्तित्व स्वीकार गर्न नसकेर आफ्नो अधिपत्य खडा गर्न खोज्दा दयाहाङ र विजयबीच देखिएको टकराबलाई रुचाएको पाइएको छ।
गीत र ट्रेलरले बटुलेको लोकप्रियता हेर्दा ‘वरिष्ठ बलराम’ ले बक्सअफिसमा राम्रो प्रदर्शन गर्ने अपेक्षा गरिएको छ। ‘वरिष्ठ बलराम’ लाई सुरेन्द्र पौडेलले निर्देशन गरेका हुन्। वृषभ सिद्धी इन्टरटेनमेन्टको प्रस्तुतिमा आन्भी फिल्मसको सहकार्य रहेको सिनेमा ‘वरिष्ठ बलराम’ मा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायत कलाकारको अभिनय छ
निर्देशक पौडेलकै कथा र सम्पादन रहेको सिनेमा को पटकथा महेश दवाडीले लेखेका छन्। आशिष एच तामाङ र श्रीराज कार्की निर्माता रहेका सिनेमा का कार्यकारी निर्माता प्रदीप जी धामी र पुस्कर बी घिमिरे हुन्। लाइन प्रोड्युसरमा राम विष्ट छन्।
मनकृष्ण महर्जनको छायांकन रहेको सिनेमा मा प्रशान्त शिवाकोटीको संगीत, सम्राट बस्नेतको एक्सन निर्देशन, प्रदीप लामाको नृत्य निर्देशन छ। यो सिनेमा लाई काठमाडौं उपत्यकामा डीसीएन र उपत्यका बाहिर कुवेर सिने डिस्ट्रिब्युसनले वितरण गर्नेछ। भिडियो हेर्नुहोस :
