ब्लकबस्टर फ्रेन्चाइज ‘कबड्डी ५ ’को मुस्ताङमा सुरु भयो छायांकन

सिनेसुत्र, बिराटनगर- लोकप्रिय सिनेमा ‘कबड्डी ५ : आफ्टर फाइनल म्याच’को छायांकन सोमबारदेखि मुस्ताङमा औपचारिक रूपमा सुरु गरिएको छ । हिमालको काखमा बसेर सुरु भएको यो बहुप्रतिक्षित सिरिजको छायांकन करिब ३५ दिनसम्म चल्ने कार्यकारी निर्माता मणिराम पोखरेलले बताएका छन् ।सिनेमाको निर्देशन रामबाबु गुरुङले गरिरहेका छन्, जसले यसअघि पनि ‘कबड्डी’का सबै श्रृंखलामा निर्देशन सम्हालेका थिए । यसपटक उनी निर्माता र निर्देशक दुवै भूमिकामा रहेका छन् भने मणिराम पोखरेल कार्यकारी निर्माता हुन् ।

सिनेमामा दयाहाङ राई, मिरुना मगर, विजय बराल, बुद्धि तामाङ, कमलमणि नेपाल र अरुणा कार्की जस्ता पुराना कलाकारहरू पुनः देखिनेछन् । यसपटक विपिन कार्की र मिस यूके नेपाल २०१७ सिर्जना गुरुङ नयाँ पात्रका रूपमा जोडिएका छन्, जसले कथामा नयाँपन ल्याउने अपेक्षा गरिएको छ ।‘कबड्डी’का अघिल्ला चारै सिरिजले बक्स अफिसमा ऐतिहासिक सफलता हासिल गरेका थिए र नेपाली सिनेमा क्षेत्रमा नयाँ अध्याय खोलेका थिए । पाँचौं भाग कहिले रिलिज हुनेछ भन्ने विषयमा भने निर्माण पक्षले अझै कुनै जानकारी सार्वजनिक गरेको छैन ।