0
Shares
सिनेसुत्र, बिराटनगर- कार्तिक ६ गते भाइटिकाको दिन रिलिज हुन लागेको नेपाली सिनेमा ‘सोल्टिनी’ ले नयाँ गीत ‘बाचुन्जेल पो’ सार्वजनिक गरेको छ। गीतमा शब्द तथा सङ्गीत प्रशान्त सिवाकोटीको रहेको छ भने स्वर प्रशान्त सिवाकोटी र झुमा लिम्बुले दिएका छन्। मधुर लय र भावनाले भरिएको गीतले सिनेमा भावनात्मक कथालाई झल्काउने प्रयास गरेको छ।
सिनेमा ‘सोल्टिनी’ को कथा एक अन्तरजातीय प्रेमकथामा आधारित छ, जसले सामाजिक विभेद, समुदायबीचको असमानता र प्रेममा देखिने सङ्घर्षलाई उजागर गर्छ। निर्देशक अर्जुन सुवेदी निर्देशित यस सिनेमामा प्रकाश सपुत र परीक्षा लिम्बु मुख्य भूमिकामा छन्। उनीहरूसँगै विल्सन विक्रम राई, रवीन्द्र झा, सुन्दर धिताल, सुजन खतिवडा, सबु गुरुङ, प्रकाश घिमिरे, प्रेम सुब्बा र कविता आले लगायत कलाकारको पनि अभिनय रहेको छ।
यसअघि सार्वजनिक ट्रेलरले सिनेमाप्रति दर्शकको उच्च चासो बढाएको थियो। ट्रेलरमा सामाजिक सन्देशसहितको प्रेमकथा प्रस्तुत गरिएको छ, जसले ‘सोल्टिनी’ लाई केवल मनोरञ्जनका लागि नभई सामाजिक चेतना फैलाउने सिनेमा पनि बन्ने सङ्केत दिएको छ। सिनेमा ‘सोल्टिनी’ को प्रमोसन अभियान अन्तर्गत कलाकार टोली देशका विभिन्न सहरमा देउसी–भैलो कार्यक्रममा सहभागी हुने भएका छन्।
पहिलो दिन कार्तिक २ गते झापाको दमक, दोस्रो दिन कार्तिक ३ गते सुनसरीको धरान, तेस्रो दिन कार्तिक ४ गते कास्कीको पोखरा र चौथो दिन कार्तिक ५ गते काठमाडौंमा देउसी-भैलो आयोजना गरिएको ‘सोल्टिनी’ का प्रोजेक्ट सुजन खतिवडाले जानकारी दिएका छन्।
उनका अनुसार, यी कार्यक्रममार्फत दर्शकहरूसँग प्रत्यक्ष भेटघाट गर्दै सिनेमाप्रति सकारात्मक ऊर्जा साट्ने र सांस्कृतिक वातावरणमा नेपाली सिनेमाको प्रचार गर्ने उद्देश्य रहेको छ। भिडियो हेर्नुहोस : 
