0
Shares
सिनेसुत्र, बिराटनगर- बालमनोविज्ञानमा आधारित नेपाली कथानक सिनेमा ‘रोल नं. १’ का लागि निर्माणपक्षले बाल कलाकारको अडिसन आह्वान गरेको छ। सेभेन सिज सिनेमाको प्रस्तुति रहने यो सिनेमा का लागि निर्माण समूहले सामाजिक सञ्जालमार्फत विज्ञापन जारी गर्दै ७ देखि १२ वर्ष उमेर समूहका प्रतिभाशाली बालबालिकाहरूको खोजी गरिरहेको जनाएको छ।
गत वर्ष नै यो सिनेमा को घोषणा गरिएको थियो। साथै, फर्स्टलुक पोस्टर पनि सार्वजनिक गरिएको थियो, जसमा कक्षाकोठाको लास्ट बेन्चमा बसेको एक बालकले हात उठाएर आफ्नो उपस्थितिको संकेत गरेको दृश्य देख्न सकिन्छ। पोस्टरले नै सिनेमा बालमनोविज्ञानसँग सम्बन्धित रहेको स्पष्ट संकेत गरेको थियो।
निर्माणपक्षका अनुसार ७ देखि ८ वर्षका ३ जना केटा बाल कलाकार, ६ देखि ७ वर्षकी १ जना केटी बाल कलाकार र ११ देखि १२ वर्षका २ जना केटा बाल कलाकार आवश्यक छन्।
बाल कलाकारहरूको रङ गहुगोरो र उचाइ २.५ देखि ३ फिटसम्म हुनुपर्ने जनाइएको छ। इच्छुक बालबालिकाले सानो भिडियो क्लिप तयार गरी [email protected] इमेल वा WhatsApp नम्बर ९८६५११९३११ मा पठाउन सक्नेछन्।
निर्माणपक्षले प्राप्त भिडियोहरूबाट शोर्टलिस्ट भएका व्यक्तिहरूलाई फाइनल अडिसनका लागि सम्पर्क गर्ने बताएको छ। सिनेमा को कथा विद्यार्थीहरूमा देखिने सामाजिक दबाब, झूटो प्रतिष्ठा र ‘जित्नैपर्ने’ मानसिकताको प्रभाव वरिपरि केन्द्रित रहेको संकेत गरिएको छ।
निर्माता विनोद पौडेलले केही समयअघि सामाजिक सञ्जालमा लेखेका थिए, “सबैलाई नजिते, इज्जतै पाउँदैन रे। गन्तीमै आउँदैन रे। अरु सबै मुर्ख अरे एउटै विद्वान, रोल न. वान… रोल न. वान… रोल न. वान।”
यस अभिव्यक्तिले सिनेमा ले प्रतिस्पर्धात्मक समाजका कारण बालमस्तिष्कमा पर्ने दबाबलाई गहिराइपूर्वक प्रस्तुत गर्ने सम्भावना देखाउँछ। सिनेमा मा जोन योञ्जनको कथा तथा निर्देशन, महेश दवाडीको पटकथा र संवाद, र प्रशान्त शिवाकोटीको संगीत रहनेछ। निर्माणपक्षले कलाकारहरूको नाम भने हालसम्म सार्वजनिक गरेको छैन।
सेभेन सिज सिनेमाको प्रस्तुति रहेको अर्को सिनेमा ‘अभिमन्यु : च्याप्टर–१’ प्रदर्शनको तयारीमा छ।
