बिराटनगर स्थित युमि स्कुलका विद्यार्थी र शिक्षकले हेरे ‘मन बिनाको धन’ : कथाले मन जित्यो

सिनेसुत्र, बिराटनगर- बिराटनगर -१९, मिलनचोकस्थित युमि स्कुलका कक्षा ७, ८ र ९ का विद्यार्थी तथा शिक्षक सहित करिब ५० जनाको समूह आज बहुचर्चित सिनेमा ‘मन बिनाको धन’ हेर्न सिटी सिनेमा हल, बिराटनगर पुगेका छन्।

विद्यालयका अनुसार उक्त सिनेमाले विद्यार्थी र शिक्षक बीचको सम्बन्ध, भावनात्मक दूरी, अनुशासन र पारिवारिक मूल्य जस्ता संवेदनशील पक्षलाई निकै गहिरोसँग प्रस्तुत गरेको छ। अभिभावक तथा दर्शकबाट “विद्यार्थीहरूले हेर्नुपर्ने सिनेमा” भन्ने सकारात्मक प्रतिक्रिया आएपछि स्कुलले टोलीले विशेष रूपमा सिनेमा हेर्ने कार्यक्रम आयोजना गरिएको बताए ।सिनेमा हेरेपछि धेरै विद्यार्थीहरू भावुक बनेका देखिए। उनीहरूले अशोक दर्जीको अभिनयलाई अत्यन्त प्रभावकारी भन्दै स्कुल,घरमा सामान्यतया घट्ने वास्तविक घटनाहरूलाई सिनेमाले जीवन्त र सरल ढंगले उतारेको बताएका छन्।

कतिपय विद्यार्थीहरूले विशेषगरी अन्त्यतिर आँसु रोकिरहन कठिन भएको अनुभव सुनाए। उनीहरूका अनुसार सिनेमाले शिक्षकप्रतिको सम्मान, साथी-भाइबीचको समझदारी, गल्तीपछि हुने पछुतो, परिवारको महत्त्व लगायतका विषयहरू मार्मिक रहेको प्रतिक्रिया दिएका छन ।

सिनेमाभर हल शान्त बनेर बिद्यार्थीहरुले मनोयोगपूर्वक हेरेको दृश्य आफैंमा कथा प्रस्तुतीको प्रभावकारिता पुष्टि गर्ने खालको थियो। विद्यार्थीहरूले ‘मन बिनाको धन’ लाई एक पटक अवश्य हेर्नुपर्ने, शिक्षामूलक र मन छुने सिनेमाका रूपमा प्रशंसा गर्दै निर्देशक एवं कलाकारहरूको मेहनतको उच्च मूल्यांकन गरेका छन्।सिनेमामा अशोक दर्जी ,सरोज खनाल,सन्तोष पन्त,रमा थपलिया, नीता ढुंगाना, भोला सापकोटा,बुद्दि तामाङ, रमेश विश्वकर्मा, रवीन्द्र झा,पार्वती अधिकारी , उत्सव सापकोटा, एआर बुढाथोकी, शंकर श्रेष्ठ, साम्राज्ञी थापा,बिना राउत, ए.आर बुढाथोकी,बाबु पराजुली,रक्षा श्रेष्ठ,प्रियंका झा,विनय अधिकारी,आर्यन पोखरेल,विजय डंगोल लगायतका कलाकारको अभिनय रहेको छ ।

सिनेमामा टंक बुढाथोकीको निर्माण तथा निर्देशन रहेको सिनेमा ‘मन बिनाको धन’लाई टंक बुढाथोकी आफैले लेखेका हुन् भने पटकथा र संवाद शिवम अधिकारीले लेखेका हुन् । सिनेमाको निर्मातामा मिनु शर्मा ( सपना) रहेकी छिन् भने , जी.पी संग्रोला, बिबेक नेपाल र बिजया पाण्डे सहनिर्मातामा रहेका छन् ।