0
Shares
सिनेसुत्र, बिराटनगर- माघ २३ गते रिलिज हुने प्रेम कथानक नेपाली सिनेमा ‘कुमारी’को दोस्रो गीत ‘तिमी बिना …’ सार्वजनिक गरिएको छ। केन्द्र मोसन पिक्चर्सबाट डिजिटल प्रिमियर गरिएको यो गीतमा केहर सिं लिम्बुको स्वर रहेको छ। गीतमा शब्द सुमन तामाङको रहेको छ भने सङ्गीत सुमन तामाङ र केहर सिं लिम्बुले दिएका हुन्। अडियो प्रोडक्सन तथा मिक्सिङ–मास्टरिङ एस्थर रिजनले गरेका छन्।
गीतको गायन शैली, शब्द तथा दृश्यात्मक प्रस्तुतीकरणमार्फत प्रेमिल भावनालाई सुन्दर ढङ्गले उतारिएको छ। युवा जोडी आकृति राजभण्डारी र अबिषेक खड्काबीचको आत्मीयता, आपसी नजिकपन र उत्साहपूर्ण मुडले गीतलाई अझ जीवन्त र प्रभावशाली बनाएको छ। यसअघि सार्वजनिक भएको पहिलो गीत ‘कता छौ मेरो फूल …’को सफलतापछि नयाँ गीतप्रति पनि दर्शकले उत्तिकै चासो दिने अपेक्षा गरिएको छ।
‘आइ एम सरी’ ‘नोभेम्बर रेन’ र ‘क्लासिक’ जस्ता प्रेमकथात्मक सिनेमाबाट चिनिएका निर्देशक दिनेश राउत निर्देशित यो सिनेमा भ्यालेन्टाइन डेको आसपास रिलिज हुने भएकाले विशेष गरी युवा दर्शकलाई लक्षित गरिएको देखिन्छ। सिनेमामा नयाँ अनुहारहरू अबिषेक खड्का र आकृति राजभण्डारी मुख्य भूमिकामा छन्। साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनषा शर्मालगायत कलाकारको पनि अभिनय रहेको छ।
पछिल्ला वर्षमा ‘प्रसाद’, ‘प्रकाश’, ‘पुजार सार्की’ जस्ता सामाजिक विषयमा केन्द्रित सिनेमा निर्देशन गरे पनि राउत ‘कुमारी’मार्फत पुनः प्रेमकथामा फर्किएका हुन्। बिनिश इन्टरटेन्मेन्ट र पिक्चर फ्रेमको सहकार्यमा बनेको यस सिनेमाका निर्माता महेन्द्र अधिकारी हुन् भने कार्यकारी निर्माता केदार भुसाल हुन्। कथा तथा स्क्रिप्ट विकास सुवेदीले लेखेका छन् भने छायाङ्कन निर्देशन सुसन प्रजापतिले गरेका छन्।
सुप्रिम पराजुलीको सम्पादन तथा कलर ग्रेडिङ र उत्तम न्यौपानेको साउन्ड डिजाइन रहेको छ। डिजिटल वितरण केन्द्र मोसन पिक्चर्सले गरेको यस सिनेमाको काठमाडौं उपत्यकामा डिसीएन र उपत्यका बाहिर कुवेर सिने डिस्ट्रीब्युशनले थिएटर वितरण गर्दैछन्। पोस्टर तथा पब्लिसिटी डिजाइन ट्राइडेन्ट कन्सेप्टले गरेको छ। भिडियो हेर्नुहोस :
