३० भन्दा बढी हलमा ५१ दिनको उत्सव मनाउँदै ‘परान’ : न्यानो कपडा लिएर आश्रम पुग्यो टिम

सिनेसुत्र, बिराटनगर- बाइस्कोप सिनेमाको ब्यानरमा निर्माण भएको सिनेमा ‘परान’ ले देशभरका ३० भन्दा बढी हलमा आफ्नो प्रदर्शनको ५१ औं दिन पुरा गरेको छ । यो अवसरमा परान टिमले बुढानिलकण्ठस्थित पवित्र समाजसेवा नेपाल आश्रम मा पुगेर न्यानो कपडा वितरण गर्‍यो ।

सिनेमाका निर्माता रन्जित आचार्य का अनुसार आश्रममा आश्रित ६५ जना अनाथ तथा बृद्धबृद्धा का लागि न्यानो कपडा वितरण गरियो । साथै निर्माता आचार्यले आगामी साता अर्को एक विशेष कार्यक्रमको आयोजना गरिने र उक्त कार्यक्रममा केही विशेष घोषणा पनि गरिने बताएका छन् ।

पवित्र समाजसेवा नेपाल आश्रमकी सञ्चालिका दिक्षा चापागाईं ले परान टिमलाई धन्यवाद दिइन् । उनले केही साताअघि आफ्ना आश्रममा आश्रित बालबालिकालाई परान सिनेमा देखाएकी थिइन् । छोराछोरी र आमाबुबा प्रतिको प्रेमलाई सिनेमाले निकै मिठो ढंगबाट प्रस्तुत गरेकाले पनि उनले परान सिनेमा देखाएको बताएकी थिइन् ।सिनेमाका निर्देशक दिपक प्रसाद आचार्य ५१ दिनसम्म पनि परानलाई दर्शकले दिएको माया देख्दा दंग छन् । उनले यो मायाले आफूलाई थप जिम्मेवारी बनाएको बताएका थिए । परानमा नीर शाह, मदनकृष्ण श्रेष्ठ, पूजा चन्द, केकी अधिकारी, अञ्जना बराइली, महेश त्रिपाठी, प्रविण खतिवडा, बुद्धि तामाङ लगायतको अभिनय छ ।

कुन–कुन हलमा छ परान ?

परान अझै पनि देशभरका ३० हाराहारी सिनेमा हल मा प्रदर्शन भइरहेको छ । शनिबार ३० बढी शो दिएको परानले आइतबार केही कम हल पाएको छ । यद्यपी कतिपय हलमा अहिले पनि हाउसफुलका साथ परान प्रदर्शन भइरहेको छ ।

शनिबार ललितपुरको लबिम मल मा रहेको सिनेमा हल हाउसफुल रह्यो । साथै पश्चिमका केही हलमा पनि दर्शकको राम्रो उपस्थिति थियो । उपत्यकाका भक्तपुर, चाबहिल, गोंगबु, नयाँबसपार्क, नयाँ बानेश्वर मा रहेका सिनेमा हलमा दर्शकको संख्या राम्रो छ । यस्तै मोफसलमा नेपालगन्ज, दाङ, बुटवल, चितवन, इटहरी जस्ता शहरहरूमा पनि दर्शकको संख्या राम्रो देखिन्छ ।

१८ करोड रुपैयाँ ग्रस कलेक्सन

सिनेमाका निर्माता रन्जित आचार्य ले परानले ५१ दिन पुरा गर्दा १८ करोड रुपैयाँ ग्रस कलेक्सन गरेको जानकारी दिएका छन् । यससँगै परानले नेपाली सिनेमा व्यवसायिक इतिहासमा सर्वाधिक कमाइ गर्ने चौथो सिनेमा समेत बनेको छ ।