जीतु नेपालको ‘आई.एम. जीतबहादुर’ सिनेमाको टिजरले दर्शकको मन जित्दै

सिनेसुत्र, बिराटनगर- अभिनेता जीतु नेपालले निर्माण गरेको सिनेमा ‘आई.एम. जीतबहादुर’को टिजरले युट्युबमा दर्शकको उत्साहजनक प्रतिक्रिया पाएको छ। सार्वजनिक भएको चार दिनमै टिजरले झन्डै साढे ६ लाख भ्युज बटुल्न सफल भएको छ भने ६ हजारभन्दा बढी लाइक र करिब पाँच सय कमेन्ट प्राप्त गरेको छ।

दर्शकहरूको प्रतिक्रिया हेर्दा टिजरको प्रस्तुति र स्टाइललाई निकै फरक र आकर्षक भन्दै प्रशंसा गरिएको छ। अहिले सिनेमा ‘पाँच पाण्डव’को छायांकनमा व्यस्त रहेका जीतु नेपाल पनि टिजरले पाएको मायाबाट उत्साहित देखिएका छन्। उनले छिट्टै सिनेमाको प्रदर्शन मिति घोषणा गरिने र क्रमशः अन्य प्रचार सामग्री सार्वजनिक गरिने जानकारी दिएका छन्। भारतीय बंगाली निर्देशक सुभेन्दु घोषको निर्देशनमा बनेको यस सिनेमाले गाउँबाट शहर आएर कलाकार बन्न संघर्ष गर्ने एक युवाको कथा प्रस्तुत गर्दछ। सिनेमामा जीतु नेपाल मुख्य भूमिकामा छन् भने उनको जोडीका रूपमा वर्षा राउत देखिएकी छन्।

यसैगरी, प्रियंका कार्की, सन्दीप क्षेत्री र देशभक्त खनालले पनि विशेष भूमिकामा अभिनय गरेका छन्। कर्मभूमि क्रिएशनको ब्यानरमा निर्माण भएको सिनेमामा निश्चल कुँवर र निरज नेपाल कार्यकारी निर्माता रहेका छन् भने राजन सिंखडा र दीपेन्द्र अधिकारीले सह-निर्माण गरेका छन्। भारतीय सिनेमाटोग्राफर अरविन्दको छायांकन रहेको सिनेमा आगामी असारभित्र प्रदर्शन गर्ने लक्ष्य राखिएको छ। बिराटनगरमा सिनेमा हेर्न टिकट बुकिंग गर्न यहाँ तल थिच्नुहोस