पल र मलिका स्टारर ‘आ बाट आमा २’ को छायांकन चित्लाङबाट सुरु

सिनेसुत्र, बिराटनगर- अभिनेत्री मलिका महत अनुबन्ध भएसँगै सिनेमा ‘आ बाट आमा २’ को छायांकन सुरु भएको छ। निर्माण टिमले सोमबार बिहान मकवानपुरको चित्लाङबाट सिनेमाको छायांकन सुरु गरेको हो। यस सिनेमाका लागि निर्माण टिमले आइतबार मात्रै मलिकालाई मुख्य अभिनेत्रीका रूपमा अनुबन्ध गरेको थियो।

सिनेमाको छायांकन चित्लाङ, काठमाडौँ र बेलायतको लन्डनमा गरिने निर्देशक चन्द्र पन्तले बताएका छन्। उनका अनुसार चित्लाङ र काठमाडौँको तालिका सकिएपछि बाँकी दृश्य खिच्न टिम लन्डन प्रस्थान गर्नेछ। एक महिनाको कार्यतालिका (सेड्युल) राखेर सिनेमाको छायांकन थालिएको निर्देशक पन्तको भनाइ छ।सिनेमामा पल शाह र मलिका महतका साथै रिश्ता गुरुङ, निकिता आचार्य, विपना थापा, आकाश श्रेष्ठ, सबिन श्रेष्ठ, प्रदीप रावत, साइग्रेस पोखरेल, गजित विष्ट र नरेन खड्का लगायतको मुख्य भूमिका रहनेछ। यस सिनेमाको कथा तथा पटकथा निर्देशक पन्त स्वयंले लेखेका हुन्।

आगामी दसैँको अवसर पारेर असोज ३० गतेबाट प्रदर्शनमा आउने तयारीमा रहेको यस सिनेमालाई नेपालभर आरआर फिल्म्सले वितरण गर्नेछ भने डिजिटल अधिकार ओएसआर डिजिटलले लिएको छ। आर्या इन्टरटेनमेन्ट प्रालिको ब्यानरमा निर्माण भइरहेको सिनेमाको मुख्य व्यवस्थापक (प्रोडक्सन म्यानेजर) करनसिंह रसाली हुन्। यो सिनेमा गत वर्ष प्रदर्शनमा आएको ‘आ बाट आमा’ को सिक्वेल (श्रृङ्खला) हो।